Saturday, January 29, 2011

गझल: आजचे सिंहासन


कोणीच गात नाही अजून भूपाळी कशी
सूर्य उगवूनही पहाट अजून काळी कशी

अंधार पिऊन सारा विझतो रोज एक तारा
राजधानीत चालली अजून दिवाळी कशी

धान्न्याने तुंबलेली कोठारे सडून गेली
वंचितांना चिंता पोटाची अजून जाळी कशी

त्यांच्या भरझारी वस्त्रांसाठी झालो आम्ही नागडे
कोणीच इथे पेटवेना अजून होळी कशी

शिक्षा शिरच्छेदाची केव्हाच ठोठावाली त्यांना
वाजेना तरी  राजाची अजून टाळी कशी

गल्लोगल्लीतून फिरती रॅंडचे वंशज सारे
बंदुकीतून सुटली नाही अजून गोळी कशी

मुजोर गार्द्यानी खूप पूर्वीच वार केले
तख्तातून नारायणाची अजून किंकाळी कशी

सिंहासना भोवती घुटमळती ही कुत्री कशी
फोडली नाही वाघाने अजून डरकाळी कशी
======
अभिजित अत्रे
======

Monday, January 24, 2011

तिची चाळीशी..

पापणीआड आज माझ्या
तोच टपोरा थेंब आहे
गहिवरून सांग पुन्हा रे
तुझे माझ्यावर प्रेम आहे

मुलांचीही संपली शाळा
चिमण्या उडणार रे भूर
भोवताली केवढा गोतावळा
तरी मन जाते दूर

छंद नोकरी आहे रे तशी
माझाही संपतो दिवस पटदिशी
रेशमाची बोचते पण ही उशी
हवी वाटते फक्त तुझी कुशी

सग्गळे सग्गळे दिलेस मला
घर आहे, गाडी आहे
मागे वळून बघ तरी
ल्याले तुझी पहिली साडी आहे

सहल नको हॉटेल नको
मल्टीप्लेंक्सची गर्दी नको
विकतच्या सुखाची आता
सोन्याचीही साखळी नको

वाढदिवसाला नको हारतुरे
अत्तराचा आता गंध सले
रुमालात लपव पुन्हा रे
सोनचाफ्याची दोन फुले

भरभरून बोल ना रे
मिठीत उचलून तोल ना रे
रस्ता ओलांडताना पुन्हा
माझा हात धर ना रे

स्वप्नांच्या पलीकडे जाता
नकोत नवीन शपथा आता
समुद्राच्या गाजे संगे
पुन्हा होऊदेत अस्पष्ट बाता

पापणीआड आज माझ्या
तोच टपोरा थेंब आहे............