मावळ्यांचे मनोगत

काय ती झाडी

काय ती वाडी 

रंगी रंगले गडी 

काझीरंगा || १ ||

भगव्याची आण 

अन् धनुष्यबाण 

आमचे पंचप्राण 

गोठलेले || २ ||

का पेटवावी कान्हा  

मशाल पुन्हा 

मायेचा पान्हा 

आटलेला || ३ ||

ही साहेबांची 

ही वारसांची 

मराठी माणसाची 

कोणती रे || ४ ||

सोने लुटू विचारांचे 

कोणत्या दसऱ्याचे

पाप सीमोल्लंघनाचे

आमच्याच माथी || ५ ||

दुभंगली नाती

दुभंगली पाती 

कोण सेनापती

सह्याद्रीस || ६ ||

बीजे रुजणार 

दुहीची माळावर

कसे फुटणार 

गवतास भाले || ७ ||

******

 अभिजीत अत्रे, पुणे 

१३ ऑक्टोबर २०२२

 (ता. क.: वसंत कानेटकर लिखित 'जिथे गवतास भाले फुटतात ' या नाटकावर आधारित, सध्याच्या राजकीय घडामोडींशी कोणताही संबंध नाही.)