फुकट

*******
फुकट, फुकट, फुकट  

फुकट, फुकट, फुकट  

साडीवर ब्लाउज फुकट  
शर्टवर शर्ट फुकट  
मान्सून सेलच्या धमाक्यात
पाऊस सुद्धा, चक्क फुकट  

फुकट, फुकट, फुकट  

भाजीवर कढीपत्ता  फुकट
नेस कॉफीवर कप  फुकट
सोन्याच्या दागिन्यांवर
चांदीचं नाणं, चक्क फुकट
फुकट, फुकट, फुकट  

फुटपाथवर ओपन जिम  फुकट
झोपडपट्टीत नळ फुकट
नगरसेवकाच्या सौजन्याने
संकुलातील बाकसुद्धा, चक्क फुकट

फुकट, फुकट, फुकट  

गणपतीत भावसरगम  फुकट  
हेमा मालिनीचा नाच फुकट  
दहीहंडी मंडळामुळे भर चौकात
माधुरीचे दर्शनं, चक्क फुकट  

फुकट, फुकट, फुकट  

पुढाऱ्याला पेन्शन फुकट
बुडवणाऱ्याला कर्ज फुकट
करदात्याच्या ढुंगणावर एक
सणसणीत लाथ, चक्क फुकट

फुकट, फुकट, फुकट

अमुक ठिकाणी वीज फुकट  

तमुक ठिकाणी शिक्षण फुकट  
जनतेच्या तिजोरीतून ओटी भरून

बहिणीचे मत, चक्क फुकट

फुकट, फुकट, फुकट  

मिळवायचंय सगळंच फुकट  
प्रेम फुकट, आशिर्वाद फुकट
आमदारांच्या कृपेने 

आईची काशीयात्रा ही, चक्क फुकट

फुकट, फुकट, फुकट  

दिवसा साहेबां कडून ग्यान फुकट
झोपल्यावर स्वप्नं फुकट
नाल सापडला आहे रात्री
मिळणार अबलख घोडा, चक्क फुकट

फुकट, फुकट, फुकट  

हे फुकट, अन् ते फुकट
शरीराबरोबर साला आत्मा फुकट
फुकट्यांच्या या दुनियादारीत
गेले की आयुष्य, चक्क फुकट.

फुकट  फुकट  फुकट  
फुकट  फुकट  फुकट
------------------------------------------
©️ अभिजीत अत्रे. पुणे
२८ सप्टेंबर २०२४
**********